كارثة سلوكية

## كارثة سلوكية ##

انا كتبت قبل كده ان العالم كله بيتكلم عن ادمان العاب Playstation و الموبيل بالنسبة للأطفال و انه خلاص بيصنفها كمرض سلوكي و ممكن توصل لادمان و تغيرات سلوكية في الأطفال و كتبت عن الموضوع ده من قبيل التحذير و لفت الانتباه فقط  ..

و لكن خلال الاسبوعين الماضيين و بمناسبه البرد المنتشر في المدارس جالي اطفال كتير للكشف اعمارهم من 5 سنوات الي 9 سنوات  .. و الاطفال دول بيتابعوا معايا من يوم ولادتهم و عارفهم و عارف اهاليهم كويس جدا و عارف تربيتهم ازاي و علاقتي بيهم كويسه جدا  و لكن فوجئت بان جميعهم تقريبا الطفل داخل عليا في غرفة الكشف و ماسك موبيل في ايده و بيلعب بيه و مركز معاه بطريقة مش طبيعيه لدرجة انه مش بيسلم و لا بيدي اي اهتمام ( مع العلم انه في الطبيعي الاطفال دي بتدخل عليا بابتسامه طفوليه مش طبيعية و في الغالب بيجروا عليا و يدوني حضن جامد و طبعا بيطلبوا بلالين او هدية كما جرت العادة ) .. كل ده محصلش و بالعكس مفيش اي تفاعل .. قلت ممكن يكونوا كبروا و حاولت بشتى الطرق اني احاول اتكلم معاهم او اهزر او حتى اغلس عليهم مفيش اي تفاعل و في الغالب مش بيبصوا عليا او بصه بطرف العين بدون اي تركيز  .. و هنا طلبت من الاهل انهم ياخدوا الموبيل من الولد علشان أعرف اتكلم معاه و أكشف عليه ...                                    و هنا بدأت الكارثة !!! تغيير مفاجئ و غير طبيعي في سلوك الطفل .. لم اراه منه قبل بهذا الانفعال و تحول في ثواني الي طفل عدواني مع الاب أو الام في  محاولة لاستعادة الموبيل و عندما حاولت أن اتدخل لتهدئة الطفل تحول الموضوع لي شخصيا و الطفل اللي من شهور قليله كان في منتهي اللطف و الذوق و الهدوء أصبح طفل عصبي غير قابل للسيطره و متهجم على الجميع بما فيهم اهله و الدكتور بتاعه و تهكم على أي سؤال بسئله مع رفض الاجابه و في بعض الأحيان رفض الكشف لأني الشخص اللي حرمته من متعته او ادمانه بمعنى أصح ..

القصة دي حصلت اكتر من مرة خلال الاسابيع الماضية و بأشكال و ردود افعال مختلفه منهم طفل رفض الكشف تماما لاننا اخدنا منه الموبيل و صمم انه يمشي بدون كشف و فعلا ده حصل !!!  و طفل تاني ضرب او حاول يعتدي على والده !!!          و العامل المشترك في جميع الحالات هو ادمان Playstation و الموبيل  ..

بأمانه مين منكم بيحصله كده في التعامل مع أبنه ؟؟ كام واحد لاحظ تغيير في سلوك ابنه معاه أو مع أخواته و أصبح طفل عصبي و عدواني و رافض للمشاركة و حتى رافض في بعض الأحيان للمدرسة و التمارين؟؟

ايه المبرر اننا نسمح لاطفال في مثل هذا العمر بأن يلعب العاب لا تناسب سنه من العنف و الفكر  و مكتوب عليها انها ممنوعه لسنهم؟؟

 ايه المبرر اننا نترك طفل عمره 5 او 6 او حتى 10 سنوات يقعد على Playstation او الموبيل بالساعات كل يوم  بحجة انه بيحبها او بتسكته و تشغله وقته .. حتى وصل الموضوع للادمان؟؟

اغلب الاهالي مصدومين في سلوك اولادهم بس مش بيعملوا حاجة و في منهم بيشتكي ان ابنه بقى بيتهجم عليه شخصيا و مع ذلك محدش بيتدخل !!!

و الله العظيم الموضوع كارثي و لازم تتدخلوا و محدش يسيب ابنه يقرر في السن ده حيلعب بأيه او حيقعد عليه قد ايه .. حضرتك ولي أمره و المسئول عنه و لازم تتدخل بكل الطرق لمنعه من كده حتى لو تطلب الأمر انك تأخد اجازة للتفرغ لابنك لو وقتك مش فاضي و مطلوب منك أنك تتكلم معاه و تحاول تفهمه و تشغله برياضه و تمارين لتفريغ الطاقة اللي جواه  ..

الله يكرمكم يا جماعة ولادكم بتضيع سلوكيا و صحيا بسبب الموبيلات و ال Playstation الحقوهم قبل ما توصلوا لمرحلة يكون الرجوع فيها مستحيل !!!